أفكار ترويض للاطفال من سن 3 - 6 وانفعت مع عيالي .....
أنا عندي بنت وولد وكل واحد له شخصيته فالمميزات أكيد محد يطالعها لكن السلبيات كلنا نلاحظها وعادة ما تكون وأنتي في السوق أو عند حمولتك تبدى العسارة والدلع وكل شي يبون أنا عندي تجربتين الأولى مع بنتي الكبيرة والثانية مع ولدي الصغير والله يستر من الثالث بس أن ليلحين اشوف خواتي وحمواتي يقولون لي انت قادرة على عيالك ولي تسوينة صح أنا خلال هالسبع سنوات من عمري عشت قصة أم وفعلا حسيت في أمي وكل معانات الأمهات وشفت ان في زمنا هذا محتاجين جهد أكبر والله المستعان و ما راح أطول عليكم في خطوات مهمة لازم تعرفينها وأدوات لازم تملكينها ومفاهيم لازم تمشين عليها :
المفهوم الأول : لازم تراقبين نفسك قبل لا تراقبين عيالك يعني لا سب ولاشتم ولا تصرفات غير لائقة لأنك انت النجمة المقلدة في كل تصرفاتك
المفهوم الثاني : كوني لسانهم شلووووون !!!!!! مو تتكلمين عنهم بس زرعي أفكارك الي بتوصلينها لهم الطفل عشان يكسب مهارة منك راح يراقبك يسمع شنو تقولين له يعني مثال انت بالعيد تحبين تلبسين بنتك فستان ولما شريتي لها الفستان قامت تصارخ تبي بنطلون فشراح تسوين في هذي الحالة راح يصير بينكم أكيد مشادة وراح يكون إنطباعك عنها انها عندية وراح تحسبك متسلطة يبتدي معاكم ما لا يحمد عقباها وهذي في حد ذاتها مشكلة عشان شذي كوني لسانهم !!!! دائما كرري وبصورة غير مباشرة مثلا من اول رمضان قبل لا تشترين لها النفنوف أو تورينها إيا قولي لها انا قبل وأنا صغيرة كل ألبس نفنوف بالعيد تصدقين أنا أحب عليك النفنوف شفتي فلانة الصغيرة بنت فلانة كل تلبس نفانيف أيييي ذكرتيني شرايك تشوفين نفنوف العيد وشفي ردة فعلها راح تفرح في النفنوف!!!!!
المفهوم الثالث: لا تنقلين خوفك لهم إذا كنتي من الخافون من الأماكن العالية أو الحيوانات جرأيهم عن طريق حمايتهم لك يعني مثلا تخافين من الدرج الكهربائي لا تكون أزمتك انك بتحمين ولدك مسكي إديه أو إيدها وقوليلها انا من لي غيرك يمى انا أخاف بس انت قوية ماتحفين مسكي إدي ونزليني يعني بدل من حمايتها خليها تحميك
المفهوم الرابع : حفظ أسرار المنزل أمامهم فلا تتكلمين أمامهم عن زوجك أو أهل زوجك ودائما استعيني بهذه الجملة !!!
ماما كل ناس حرين في بيتهم وكل بيت له قانونة ولزم نحترم خصوصية وحرية الآخرين
الأدوات المستخدمة في تربية الأطفال :
1- الصبر الدعاء لهم بالهداية والصلاح
2- المراقبة الغير مباشرة لا تراقبين تصرفاتهم وهما عارفين حاولي تكونين دائما برة المشكلة عشان تعرفين تحلينا
3- لا تكبرين المشاكل أمام عيالك وخذي تفكيرك قبل الحل
4- وضع خطة تنظم حيات عيالك مثل وضع جدول للتلفزييون بحيث كل واحد له ساعة
5- دائما كوني متواجدة في المنزل وقت النوم وخلي مواعيد النوم ثابتة ومبكرة راح تحلك كثير من المشاكل
6- عصاه للتخويف لا للضرب ولا تستخدمينها كثيرا عشان تكون لها هيبتها
8- خلي للأب هيبته حتى لو ما يدري عن البيت أو ما في حوار بينكم لأن راح يجي اليوم إلي راح تحتاجين له
9- دائما ابتكري حلول جديدة وخلي هدفك البيت الآمن
10- زرعي القيم في ذهن عيالك ولا تملي من التكرار
11- دائما حطي ورقة وقلم وسجلي مميزات وسلبيات عيالك
12- احمدي الله دائما تجدين البركة
بعض المشكلات الي واجهتها :-
المشكلة الأولى : كنت في شقة بروحي وكانت بنتي عمرها ثلاث سنوات وبعدين لظروف رجعنا بيت حمولتي أول ما سكنا صارت البنت كل شي تقول حق خالتي وما تبي تمشي على نظامي في وقت النوم فطبعا خذيت وقتي في التفكير وما طاف أربع تيام على السالفة إلا ولقيت حل وكان
سويت شنطة وحطيت ملابس بنتي فيها وكانت حقيبة سفر وبنتي عند خالتي رحت لها بروحي من غير الشنطة طلبت منها انها تروح شقتي رفظت وصارت تبكي وتصارخ رق قلب خالتي وقالت خليها قمزت حق خالتي وجبت الشنطة وقلت حقها هذي هدومك اذا ما تسمعين كلامي وطيعتيني وما تبيني انت حرة وهذا قرارك وانت المسؤولة انت اخترتي اديده صح هذي هدومك وخليها تصير امك ودخلت الشقة خمس دقائق بالضبط رجعت مع شنطتها وباستني وتأسفت وما كررتها وصر لنا ألحين سنتينت بس أقول الفراش على طول بدن مناقشة وشكرا للشنطة وكررت السالفة مع ولدي هذي السنة لأنه ما يبي يلبس ولايغير ملابسه عشان ينام فسوتله شنطة وحطيتها عند باب الشقة وقتلت له إذا ما سمعت كلامي وطعتني وتبي كل شي على كيفك انت حر هذي شنطتك وروح دور ماما ثانية بكى ولمني وراح بدون كلام الحمام وبدل ونام وألحين بس أقول حمام بدون صراخ
المشكلة الثانية : اني أذا كنت برة أو ماأبيهم يجسون شي كنت أصرخ أو أعصب وكنا مسافرين وبنتي أذتي بس أهد إديها تركض وقعدي ركضي وراها وكنا في مصر وكنت في احدى المجمعات التجارية فرحت مكتبت كتب شريت كتيب مترجم من شركة بيبي جونسون للحلول السريعة على حسب الاعمار وكان الحل انهيها مره وحدة وبعدين من 1-3 راح ترجع وصارت طريقة مميزة في النهي في البيت أنا والأبو على طول نستخمها
المشكلة الثالثة : التلفزيون صارو يتهاوشون عليه والألعاب فشسويت اجتمعت فيهم وقتلهم أني أنا ما أقدر اشتري أكثر من تلفزيون في البيت ولازم نسوي جدول مواعيد كل واحد له ساعته
وفي مشاكل وايد بس دايما تكون عن طريق الحوار بين عيالي وهذي تجربتي
بس حطي في بالك هذي المعادلة حنان وحزم = أم قوية
وشكرا على سعة الصدر
منقـــــــــــــــــول
