أكيد لما بتيجي سيرة الأكل أول حاجة بتفكري فيها هي علاقة الأكل بوزنك والريجيم..
لكن عمر ما جه في بالك إن الأكل له تأثير على حاجات تانية خالص زي تأثيره على حالتك النفسية، وكمان على قوة ذاكرتك وتركيزك وقدرتك على استجماع واسترجاع المعلومات..
علشان كده النهارده هنعرف مع بعض إيه أنواع الأكل اللي ممكن يكون ليها تأثير كويس على صحتك النفسية علشان تساعدك إنك تكوني امرأة عصرية قادرة على أن تتكيفي مع كل الأزمات والضغوط اللي ممكن تقابليها في حياتك...
1- السمك لتحسين قدراتك
أكيد كلنا عارفين إن السمك له فوائد كتيرة جداً، لكن اللي مش كلنا نعرفه إن فيه أنواع زي البلطي والسردين والأنشوجا فيهم مواد بتغذي المخ وشبكية العين والأعصاب، وكمان بتزود طاقتك وقدرتك على تعلم أشياء جديدة وكمان بتقوي ذاكرتك جداً وبتحسّن قدرتك على حل المشاكل.
2- البقول غذاء العقول
كل أنواع البقول زي البسلة والعدس والفاصوليا الخضراء أو البيضاء والفول واللوبيا، بتساعد على تنشيط الدماغ واستقرار مستويات "الجلوكوز" وهو غذاء المخ، وعلى فكرة الفاصوليا الخضراء مهدّئة جداً للأعصاب.
وتقدري إنك تتغلبي على اضطرابات المعدة اللي ممكن يسببها أكل البقول، بإنك تنقعيها من 6 لـ 12 ساعة قبل ما تطبخيهم.
3- الألبان للروقان
كل منتجات الألبان زي الزبادي والجبن واللبن مليانة بالكالسيوم اللي بيحسن وظيفة الأعصاب ويقويها، وكمان الزبادي بيحتوي على مواد بتزود القدرة على الانتباه والتركيز.
4- المكسرات لأحلى الأوقات
المكسرات من الأكلات التي تحتوي على فيتامين E و B6 ومكونات تانية كلها بتحسن الحالة المزاجية جداً وكمان مفيدة جداً للمخ، ومن المكسرات دي الكاجو واللوز والفستق والفول السوداني.
5 - الشاي الأخضر لعلاج التوتر
الشاي الأخضر هو أفضل مشروب ممكن أنه يساعدك على علاج التوتر، مش كده وبس ده كمان بيساعد على زيادة التركيز والذكاء.
6 - البيض لذاكرة حديد
البيض وخصوصاً الصفار عنصر غني بفيتامين B وكمان بيحتوي على مواد مقوّية جداً للذاكرة.
7 - الخضروات لأحلى الذكريات
الخضروات من الحاجات المهمة جداً لتقليل الإحساس بالغضب والعصبية، وكمان لتحسين القدرة على استرجاع الذاكرة يعني لو كنتِ بتنسي بسرعة وخصوصاً لو كنتِ لسه طالبة ومحتاجة تفتكري كل حاجة بتذاكريها يبقى لازم تاكلي خضار كتير، ومن الخضروات دي الكرنب واللفت والبروكلي والقرنبيط والفجل والسبانخ.
8 -اللحم الأحمر للتفكير
اللحوم الحمراء والكبدة من الأكلات اللي فيها نسبة الحديد عالية جداً، والحديد ضروري لإمداد المخ بالأكسجين اللازم علشان يؤدي وظيفته بشكل جيد، وكمان قلة نسبة الحديد في الجسم بيؤدي لنقص الذكاء وبطء التفكير وقلة التركيز.
9- الماء سر الذكاء
الماء من العناصر الأساسية والضرورية جداً علشان المخ يشتغل بشكل سليم، حيث إن الماء بيدخل في حوالي 3/4 مكونات المخ، وعلشان كده قلة شرب الماء بتؤدي إلى قلة قدرة المخ على تخزين المعلومات والتفكير وضعف الذاكرة.. يعني لازم تشربي على الأقل 8 أكواب من الماء يومياً.
10- المريمية وصفة سحرية
المريمية ده عشب يُشبه النعناع، ويستخدم كأعشاب في الأكل أو ممكن تشربيه ساخن، وهو له فوائد صحية كتيرة جداً، وثبت إنه بيحمي من مرض السرطان، ده غير إنه بيساعد على إفراز مواد مسئولة عن نقل الرسائل العصبية من وإلى المخ. وكمان بيساعد في رفع الحالة المعنوية وعلاج الاكتئاب.
11- الفراولة.. شباب على طول
الفراولة من الفواكه اللي لها تأثير جيد جداً على القدرات الحركية والقدرة على التعلم وتنشيط الذاكرة، كمان بتقلل من مخاطر ضعف الإدراك المرتبط بالتقدم في السن.
12- الصويا للحيوية
كل الأكل اللي بيحتوي على الصويا زي اللبن الصويا وفول الصويا بتقلل من فقدان الذاكرة وكمان فيه نسبة عالية جداً من البروتينات المفيدة للجسم واللي بتخليكِ مليانة صحة وحيوية، ولو كنتِ عايزة تقللي وزنك فهو بيقلل الشهية وبيسرع الشعور بالامتلاء والشبع كما تلعب الصويا دوراً في تخفيف الكرش وتراكم دهون البطن.
13- الشيكولاتة لأوقات السعادة
الشيكولاتة مش بس حاجة لذيذة لا دي كمان مفيدة جداً للمخ، وكمان بتحسّن الحالة النفسية جداً، وبتزود القدرة على الاستيعاب والتركيز، بس لازم تاخدي بالك من كميات الشيكولاتة اللي بتاكليها لأن كترها ممكن يؤدي إلى إدمانها بإنك تبقي مش قادرة تستغني عنها.
14- القهوة للقوة
لو شربتِ فنجان أو فنجانين قهوة في اليوم ده بيقلل من فرصة تعرضك للاكتئاب وبيزود من قدرتك على تحمل المشاكل اليومية، بس أهم حاجة إنك ما تزوديش الكمية عن كده علشان ما تعملش نتيجة عكسية.
15- البرتقال للتفاؤل
البرتقال عنصر غني جداً بفيتامين سي، الذي يعتبر مولد الطاقة في الجسم، وأي نقص في كمية الفيتامين ده في الجسم بيتسبب في الشعور بعدم الراحة والإرهاق، كما أن تناول كمية أكبر من فيتامين سي يمكن أن تجعلك أكثر ابتهاجاً وتفاؤلاً.
16- الموز قبل النوم
الموز من الفواكه اللي بتقلل من إحساسك بالقلق والتوتر، وكمان بتخلي نومك هادئ ومريح؛ لأنه غني بمادة الماغنيسيوم اللي بتهدي الأعصاب جداً.
17- الكاري لتجنب الزهايمر
الكاري مفيد جداً لتجنب أعراض الشيخوخة وفقد الإدراك أو "الزهايمر".
18- الجزر.. مش بس بيقوي النظر
كلنا طبعاً عارفين من زمان إن الجزر مفيد جداً في تقوية العين والقدرة على الإبصار، لكن مش دي بس فايدته الوحيدة؛ لأنه له فوائد تانية كتيرة جداً، ومنها إنه بيعمل على تهدئة الأعصاب وتحسين الحالة النفسية.
19- التمر فيه السر
التمر من الأكلات اللي ذُكرت في القرآن الكريم، وطبعاً له فوائد كتيرة جداً صحية، بالإضافة إلى إنه بيزيد من الإحساس بالهدوء النفسي والعصبي.
20- النشويات لرفع المعنويات
كل الأغذية الغنية بالنشويات زي الخبز والمكرونة وغيرها من المعجنات بتحسن معنوياتك جداً، وبتقلل من فرصة إصابتك بالعصبية والعنف الشديد أمام المواقف الصعبة، وعلشان كده الناس اللي بتتبع ريجيم خالي من النشويات بيكونوا أكثر عرضة للاكتئاب من غيرهم.
وفي النهاية لازم تعرفي إن كل الأكلات اللي فاتت دي حتى ولو كانت مفيدة لازم تكوني معتدلة في تناولها... لإن الإفراط في أي حاجة ممكن يكون له آثار عكسية
وزدتو من قيمته ودائما بكون فى انتظار رايكم وردودكم التى تسعدنى كثيرا 