دهون صريحة
في الأول كده أحب أنبه على حاجة
لو الكلام ده سمعتي زيو قبل كده فأنتي ياما سمعتي – بس ايه متأكدة انه صح ؟ وايه بتطبقيه في حياتك؟
الدورة دي هدفها انك حتى لو عارفة كل حاجة تطبقي
فياريت بلاش تعليقات من طراز " كلام متكرر سمعناه كتير"
ثانيا بأه : بعد ما بقالي ساعتين بأكتب الصفحة اتقفلت والكلام اتمسح يعني هاكتب من الأول تاني
نبدأ
قبل ما أقول أي حاجة خلينا نرفع شعار
" مش معني أكل الدهون أنك هتبقي طخينة "
خلينا نشوف ايه الكلام الغريب ده
§ الدهون عموما بتعطي طاقة (سعرات حرارية) أكبر من البروتينات والكربوهيدرات (النشويات ذي الأرز والبطاطس – السكريات مصيبتنا الكبيرة)
§ تعرفي بأه أن الجسم محتاج كمية من الدهون عشان تساعديه يخس !! آه ؛ ما أنتي لما تحرمي جسمك من عناصر غذائية مبيقدرش يكونها يا تري هايجيبها منين – فاكرة الحلقة اللي فاتت قلنا فيها ازاي فيه رجسمات مبتخسسش ؟
§ أنا سمعت كلام كتييييييير عن رجيمات بتقول : " ممنوع الدهون منعا باتا" ورجيمات تانية بتقول :"ممنوع السكريات منعا باتا " وانتي طبعا شاطرة ومذاكرة الحلقة اللي فاتت وعارفة ليه الأنواع دي مضرة
أمال بأه ايه الصح؟
الصح إننا ندي الجسم احتياجاته من الدهون الصحية عشان منخسش وجسمنا يترهل وعشان نعرف نخس وعشان صحتنا
يبقي احنا بنتكلم في حاجتين :
§ الجسم محتاج دهون لازم يأخدها
§ لازم الدهون اللي هايخدها تكون دهون صحية ونقلل من الدهون غير صحية
تعالي معايا نتعرف على أنواع الدهون (سمنة وزيت) بطريقة علمية مبسطة
الدهون أنواع:
1- دهون مشبعة <سمنة زبدة>
غير مفيدة للجسم لأنها (شبعانة) ومبتدخلش في تفاعلات تخلص الجسم من بعض السموم
وعشان كده كترها بيسبب ارتفاع معدلات الكوليسترول في الدم وافتحي يا مستشفيات واجري علي العيادات وابلعي اطنان ادوية
2- دهون غير مشبعة <زيوت>
ومن اسمها كده (هيا مش شبعانة أوي) – يعني ممكن تدخل في تفاعلات تخلص الجسم من السموم – وهيا منها نوعين: نوع (Mono) ونوع (Poly) وهنفهم الفرق بينهم بعد شوية – لكن عموما تراكمها مش في نفس ضرر الدهون المشبعة
3- دهون مهدرجة
دي بأه دهون مش طبيعية
دي بأه السمنة النباتي المهدرجة اللي بناكلها
ودي بأه اللي بتدخل في الحاجات اللي بنشتريها من بره – حاجات في أكياس بتلمع أو حلويات بنشتريها معمولة بمارجرين وحاجات من دي (مش هيعملولك بسمنة بلدي أكيد)
ودي بأه الوجبات الجاهزة (ما هما مش هيقلولك بزيت زيتون) – الوجبات اللي انتي عاوزة تخلصي نفسك فتشتريها وانتي رايحة الشغل ولا وانتي عاوزة ترتاحي من عمايل الاكل ولا حتى عشان تفرحي عيالك
متقوليليش معرفش – أكيد تعرفي ومليون تعرفي أنها مضرة – يا تري أمتي هنخاف على صحتنا وصحة ولادنا
يا تري امتي هنفتكر أن ربنا هايحسبنا على المصايب اللي احنا بناكلهلهم
ياتري امتي صحتك هتكون غالية عليكي
يا تري هتفرحي لما تجري على العيادات بالعيل ده ولا ده ولا جوزك تلاقيه قعد من الشغل
وكمان حاجة أسوء : متقوليش أنا الحمد لله باطبخ بسمنة بلدي
هأقولك ما انتي أكيد مبتقليش بزيت زيتون ولا ايه؟
مش هاتكلم كتير بس هاديكي معادلة نحلها سوا
زيوت مهدرجة = أخطار صحية فظيعة
قلي = زيوت مهدرجة + كمية أكبر من الدهون + نزع القيمة الغذائية للأكل
شوفتي احنا بنعمل ايه
أكيد عارفة
عارفة انك في كل أكلة بتدي لبيتك وجوزك وعيالك ونفسك أجمل هدية أمراض القلب وتصلب الشرايين والذبحة الصدرية والحاجات اللذيذة دي اللي تودي في داهية)
ياتري امتي هنحس ان فيه نعمة اسمها الصحة ونبدأ نحافظ عليها
ياتري كنتي بتسمعي زمان عن الكوليسترول العالي
ولا كنتي بتسمعي عن شباب في سنك أو أصغر منك جالهم القلب
ياتري كنا بنسمع عن الأمراض اللي بنسمعها دلوقتي
شوفي بأه أنتي بتأكلي ولادك ايه
بتأكليهم حاجات مصنعة من بره متعرفيش مكوناتها ايه
بتأكليهم دقيق مفيهوش غذا ( دقيق أبيض فاخر لأغراض التورت والجاتوهات)
بتأكليهم سمنة نباتي مهدرجة ويقولك (خالي من الكوليسترول) و( طعم وريحة الزبدة الفلاحي ) – طيب مقلتلناش بأه أن السمنة دي كانت عبارة عن زيوت وبعدين عملولها عملية صناعية ( اسمها هدرجة) فبقت دهون مهدرجة ذي اللي اتكلمنا عليها وقولنا مصيبتها سودا
الدهون الصحية
عشان مااطولش عليكي هاكللمك بأه عن الدهون الصحية
1. أي دهون في صورة طبيعية لم تمتد إليها يد الإنسان بالتصنيع (سواء مشبعة أو غير مشبعة) أو رفع درجة الحرارة (بالنسبة للمشبعة) فهي دهون صحية
2. احفظي المعادلات دي
سمنة / زبدة = دهون مشبعة = تصلب شرايين وكوليسترول (بتترسب في الأوعية الدموية)
زيوت = دهون غير مشبعة = تخن (بتترسب تحت الجلد)
زيوت مهدرجة = تخن + جميع المصائب الأخري
3. باختصار كده – عشان تعرفي الدهون صحية ولا لأ اسألي نفسل
§ لو دهن نباتي : يا تري ده مهدرج ولو مش مهدرج يا تري محطوط عليه كيماوي ولو مش ده ولا ده يا تري انا باهريه على النار في قلي أو غيره؟
§ ولو دهن حيواني : يا تري الحيوانات دي اتربت فين؟ يا تري كلت ايه؟ كلت حقن هرمونات ومضادات حيوية وأكل بيسمن ؟
التلت نقط دول هما اختصار الكلام اللي جاي كله
الدهون الحيوانية: ( السمك على الحوم على الدواجن على منتجات الألبان )
مش هانتكلم كتير
باختصاركده –كلها حاجات واخدة هرمونات ومضادات حيوية
يا تري هو ده الطبيعي ؟
باختصار بردو كده عشان ماسمعكيش كلام متكرر
الحيوانات تربية مزارع دهونها ضارة والسمنة البلدي المعمولة منها ضارة
أنا كنت بقول نجيب من الريف بأه – طلع كمان أنهم بيأكلوهم نفس الهرمونات والمصايب دي
طب احنا نعمل ايه؟
يعني منكلش ولا ايه؟
(يافرحتي – ما احنا عارفين – هو ده اللي انتي جايه تقوليهولنا؟)
لا يا حبيبتي كلي بس خدي بالك تحاولي بقدر الامكان تعملي الحاجات دي عشان تقللي مخاطر الكلام ده
احنا بردو واقعيين ومش هاقولك روحي ربيهم في البيت
1- اللحمة (بأنواعها) حاولي تخليها من الدهن
ومتقوليليش العيال بيحبوا السمين – الله يكرمك كفاية
2- السمك حاولي تجبيه من الفلاحين أو الصيادين وميكونش سمك مزارع
3- اللبن والزبادي والجبنة تجبيهم منزوعي الدسم
متقوليليش ده كده أنا برمي الخير بتاعهم – هاقولك خير عبارة عن ترسيبات الهرمونات والمصايب اللي الحيوانات بتتعلف بيها – هو ده الخير؟
4- تحاولي تجيبي زبادي بلدي وجبنة فلاحي من وقت للتاني عشان الجسم محتاج شوية فايتامينات من الدهن الحيواني ولازم ياخدهم
الدهون النباتية: (محتاجة تركيز شوية)
احنا قلنا نسأل نفسنا قبل ما نستخدم دهن نباتي اذا كان مهدرج (سمن نباتي ) أو مكرربكيماويات
أنا مش هاكلمك في حاجات خيالية مش موجودة في الأسواق بتاعتنا وبتلاقيها لو قرأتي أبحاث أجنبي أو مترجمة
لأ.. أحنا هنتكلم عن الزيت والسمنة اللي أنا وانتي بنشتريهم
هنتكلم عن زيت الدرة وسمنة معرفش ايه وزيت التموين كمان
هنتكلم عن زيت أبو 3 جنيه وزيت أبو 6 وزيت أبو 30 كمان
ايه بأه الصحي وايه مش صحي؟
§ قاعدة عامة : أي دهون لم تصلها يد الإنسان بالتصنيع فهي دهون صحية سواء مشبعة أو غير مشبعة
§ أي دهون غير مشبعة يتم رفع درجة حرارتها تصبح مهدرجة وضارة
§ الدهون غير مشبعة نوعين – واحد منهم (Mono) وده متمثل في بلادنا في (زيت الزيتون البكر)
أنا عارفة أنه غالي ومش كل الناس تقدر تجيبه – بس لو ازازة كده ربع لتر تحطي منها على السلطة يبقي كويس
§ أما الدهون غر مشبعة من نوع (Poly) لازم تأخدي بالك منها – اقرأي الكلام اللي جاي بس متتخضيش:
" عدد كبير من الباحثين (غير المرتشين ومالهومش مصلحة) أجمعوا أن الإفراط في استخدام الدهون المهدرجة الناتجة عن دهون غير مشبعة(Poly) ( يعني سمن نباتي أو زيت قلي) هو السبب الرئيسي في أمراض القلب والسمنة التي ظهرت بداية من النصف الثاني من القرن العشرين"
زيت بذرة القطن بتاع التموين
زيت الدرة ولا عباد ولا أي حاجة من دول
لما بتقلي بيهم المركبات السمية بتدخل مع الأكل
كل ما درجة الحرارة تعلى كل ما المركبات دي بتزيد
الزيت اللي مش بتاع التموين ميزته الوحيدة أنه محطوط عليه (مواد كيماوية) عشان (تقلل) نسبة الهدرجة
بتقلل مش بتمنع – خدي بالك – وكمان دي مواد كيماوية
بسيطة صح؟
لأ مش بسيطة
الدهون دي داخلة في كل حاجة
داخلة في الحلويات اللي بتشتريها من الحلواني (زبدة مارجرين ماهم أكيد مش هيعملولك بالسمنةالبلدي)
داخلة في أكياس الحاجة الحلوة اللي عيالك مضايعين مصروفهم عليها
داخلة في الأكل اللي بتجبيه من بره وانتي رايحة الشغل ولا الكلية عشان معندكيش وقت تعملي اكل من البيت
مش بيقولولك " تحفظ بعيدا عن أشعة الشمس"؟
ياتري كام مرة عاملتي بطاطس مقلية لولادك عشان يتسلو الشهرده؟
ولا كام مرة اشتروها هما من بره؟
و ياتري كام مرة انتي اصلا عملتي حاجات مقلية الشهرده؟
ياتري بتحمري وتقلي وعاوزة جوزك وولادك يكبروا من غير امراض؟ ( يمكن الاستعانة بصديق للإجابة)
بس محدش يفهم غلط
الدهون الغير مشبعة (Poly) مفيدة والجسم محتاجها بس لو اتسخنت بتبقي خطر خطر
يعني من الآخر : مفيش قلي
متتخضيش أوي كده – أحنا هنحاول مع بعض نلاقي بدائل صحية – فان كنا احنا في مصر الناس متعودة على الأكل المحمر والمشمر والمسبك واللي معرفش ايه فأكيد مش هانقلك كولي مسلوق
خليكي معانا
موضوع الكوليسترول
الكوليسترول دي مادة أليفة ولطيفة ومبتخوفش – بس للأسف لما تزيد في الدم بتعمل المشاكل المعروفة بتاعت تصلب الشرايين والذبحة الصدرية والسكتة الدماغية والكلام ده
عارفة ليه احنا بنتهاون في الحاجات دي؟ عشان هيا طويلة المدي – بتترسب واحدة واحدة وبعدين تخنقك – لكن لو كانت بتموت من أول ما تاكليها مكنتيش هتقربي ناحيتها
هو ليه صحتك وصجة ولادك رخيصة عندك كده؟
طيب ايه بأه اللي بيخلي الكوليسترول يعلي؟
أولا ثم أولا : الدهون المهببة (أقصد المهدرجة) زي السمن النباتي والزيوت المقلية والمرتفعة درجة الحرارة
ثانيا: الوجبات السريعة (دول حتى الاجانب بيسموها في اللغة الدارجة Junk food طعام زبالة) – ما هما أكيد مش هيقلولك بزيت زيتون- مش كده ولا ايه؟
ثالثا: السمنة والزبدة: مش قلنا قبل كده السمنة بتترسب على جدران الاوعية الدموية والزيت تحت الجلد؟ شكلك كده لسه مذاكرتيش كويس
طب وايه الحل بأه؟
ما احنا منقدرش نقلي بزيت زيتون- تعالو نفكر في شوية بدائل واقعية للقلية عشان ان كنا مش هنقدر ناكل اكل 100 في 100 صحي يبقي نقلل المخاطر على أد ما نقدر
1- نقلل استخدام الدهون(سمن وزيت) عند الطبخ à عشان ميحصلهاش هدرجة
2- نستخدم للتحمير والطبخ (سمنة بلدي – أو زبدة فلاحي أو زيت زيتون ) إن أمكن à عشان نقلل الهدرجة
3- نحط زيت على السلطة مش لازم زيتون ممكن درة أو أي حاجة à عشان احتياجات الجسم
4- القلي خطر فنفكر في بدائل لكل حاجة بتتقلي :
§ يعني أقلها أوي أسلقي الحاجة وبعدين شوحيها أو حمريها في شوية سمنة صغيرين
§ حطي الحاجة في الفرن وعليها شوية سمنة صغيرين
§ أو الشوي – مين مبيحبش المشوي – يا ستي حطيها في الفرن وبعدين ابقي حطي حتة فحمة في شوية زيت عشان تديكي ريحة حلوة
§ نخبز بدل ما نقلي – يعني مثلا بدلا ما تقلي الاكليروبلح الشام والدونات يا ستي بيتعملوا في الفرن
§ اسلقي بدل ما تقلي ( فراخ – لحمة – بيض)
§ اعملي أكل جديد جميل من غير قلي عشان ولادك يحبوه
§ حاولي تتعلمي حاجة جديدة عشان الاولاد ميبصوش لبره – متقوليش مش هاعرف – هو الناس اتخلقت طباخين؟
في النهاية أحب أقولك:
تقليل الدهون في الطبخ مش عشان بس وزنك ميزيدش
لكن عشان تحافظي على نعمة مش عند ناس تانية
تحافظي على صحتك وصحة الكتاكيت اللي مغلبينك – بس لو حد فيهم جاله برد شوفي بتبقي قلقانة ازاي – أمال بأه لو جالهم القلب ولا مصيبة من المصايب دي هتعملي ايه؟
لما البيت كله يتعود على الاكل الصحي أكيد مش هترجعي تاني تاكلي دهون مضرة
وبكدا نكون خدنا البيت كله خطوة لودام في طريقنا عشان نوصل لجسم صحي أولا ومشدود ثانيا
أنا كده خلصت
بس عاوزين نتفق ممكن نعمل ايه ونتابع نفسنا ازاي
1- تيجيبي ورقة وفي نهاية كل يوم تدي لنفسك درجات بعد ما تقرأي الحلقة دي تاني وتشوفي
كل ما عملتي حاجة كويسة اتعلمتيها من هنا ادي لنفسك درجة في الايجابيات
كل ما تعملي حاجة قلنا عليها مضرة تدي لنفسك بردو درجة – بس في السلبيات
تحوشيلنا الدرجات دي كلها لغاية آخر الشهر لما نطلبها منك
2- تحاولي تفكري في بدائل للمقليات وتكتبيهالنا في الموضوع عشان نجمعها في بداية الحلقة الجاية
3- تبدأي تقللي من أكل بره
4- تحاولي تعودي الولاد على عدم شرا الاكل بتاع بره – ده طبعا لو يهموكي – النقطة دي بالذات محتاجة مجهود لو عملتيها هنزودك درجات كتير
ممكن أقولك سر محافظة الممثلات على جسمهم : عشان شغلهم والفلوس اللي بيكسبوها غالية عليهم فمش عاوزين يخسروها – لازم تبان جميلة على طول
لكن انتي بأه قليل عليكي تبقي جميلة – يعني مفيش حاجة تهمك – فليه تتعبي نفسك
يعني من الاخر نعمل ايه؟
بصي
لو حاجة هتسخن على النار او تتشوح او تتحمر تستخدميلها سمنة بلدي او زبدة بلدي (ان أمكن ) عشان متتفاعلش ويحصل هدرجة
لو حاجة بتتعمل على البارد ذي السلاطات تحطي عليها زيت مفيش مشكلة عشان هيبقي مفيد ومش هيحصل هدرجة
القلي ضار وملوش حل غير انك تستغني عنه
اللحوم تشيلي دهنها
الاسماك تجيبيها مش مزارع
منتجات الالبان تشتريها منزوعة الدسم
منقوول وللموضوع بقيه
